ربي اني استودعك جنيني .. ربي ارزقه الصحة والعافية والخلقة الكاملة لا زيادة ولا نقصان .. ربي تمم لي على خير ..

دعواتكم بتسهيل الحمل والولادة ..

تعمدت اعطيهم خبر قبلها بيوم بس عشان ماحبيت انهم يكلفون انفسهم بهدايا وغيره
حضورهم بالنسبة لي احلى هدية

طبعا قبلها أنا كنت مجهزة لهم شغلات بسيطة وجهزتهم بكيس الهدايا
وهم وتفاجئوا مرة وحبووها واستغربوا ان صاحبة العيد هي الي توزع الهدايا

أنا مرة حسيت بمتعه وانا اجهزهم خصوصا البطاقة
صممتها في البيت وطبعتها ولان الوقت  كان متأخر ورحت نمت وكملت الشغل يوم ثاني بالدوام

زوووم

وهذة صورة الأكياس بعد ما حطيت فيهم الأغراض

وهذا الأكياس من داخل

مستر خرووف يسلم عليكم …

طبعا كان غدانا في مطعم بيت التنور… تلاقينا هناك وقت بريك الغدا
وتغدينا سوا وسوولفنا وضحكنا وعرفنا اخبار بعض

لكم لقطات من الطاولة .. طبعا كالعادة ما تذكرنا نصور الا بعد ما أكلنا << الجوع كافر

هذا صحني وصحن حيوووت..

زووم على صحني ..طبعا خلطة غريبة ..روبيان صيني ورز هندي والسلطة فتوش لبناني

وهذا صحن نونوو بس من اللقطة من بعيد خخخخ وغراض ندوشة قاطة في الصورة

وهذا صحن ندوووشة طبعا ما رضت أصور الا بعد ما رتبته…

وهذا صحن فتوووومة خخخ شبه فاضي بالعافية على قلبهااا

وهذا صحن سووسوو الانيقة …

والكوكاكولا في قلوبنا

عليكم بالعافية صديقاتييي ومطرح ما يسري يمري

……

طبعا الجووو خيااالي ومطر خفيف …

مع سلامة ندووشه وفطووومة

بطاقة مره تهبل .. والكلمات لمست قلبي بقوة .. شكرا فطووومه

وهدية لزيزه اوي من نونوووو .. شكرا حبيبتي

وهذا كان يومي حبيت أشاركم فيه .. واتمنى تكون السنة حلوة مثل بدايتها

** معذرة على قله جودة الصور لانها برعاية ايفون 

صار لي فترة طويلة احلم اشتغل في ادارة احدى ارقى المتشفيات في الشرقية !

وفعلت سوينا المقابلة وعديتها بجدارة..

لكن الله ما كتب .. واكيد خيرة .. والوظيفة راحت للي هي من نصيبها ..

الله يبارك لها ويعطيها خيرها وكفيها شرها ..

..

مرت الايام .. ولقيت وظيفة توفرت فيها اكثر الموصفات الي كنت ادور عليها ..

ماعدا الراتب !!

ماهو قليل بس ما ينااسب طموحاتي .. وطبعا لما اقول كذا..

إلقى نفس الرد من زوجي .. ” احمدي ربك غيرك مو حاصل له”

انا بالعكس احمد ربي واشكره على توفيقة لي .. بس الانسان دائما يطمح للأفضل ..

وما يمنع انه يطور من نفسه ويدور فرص أحسن ..وصرت اسوي مقبلات هنا وهناك ..

ومره تخيب ومره تصيب ..

…

والحمد الله ربي وفقني بوظيفة احسن من ناحية الراتب والمسمى الوظيفي ..

والاحلى انها في احد افضل المتسشفيات في الشرقية ..

ما تدرددت كثير .. لاني من زمان نفسي اجرب الشغل في المستشفى ..

واستخرت والحمد الله كانت مره كويسة ..

وتوكلت على الله .. ووقعت العقد .. وانا يغلب على قلبي الحماس .. اكثر من الخوف ..

…

الي كان الي خليني اتردد شوي اني راح ابتعد عن زميلاتي الي احبهم ..

وعن وظيفتي المريحة .. وعن المكان الاستراتيجي ..

لكني قعدت اكلم نفسي واقول : زميلاتي يحبوني واحبهم صح..لكن مصلحتي اهم ..

واي وحدة فيهم بتلقى عرض أحسن ما راح تتردد وبتقعد عشاني..

وغير اني احب التحدي والمغامرة.. وما اطيق الروتين .. يتعبني نفسياً..

الوظيفة هذة راح تنمي فيني اشياء كثيره .. والتطوير حلو ..طموحي كبيــر ولازم احققه ..

كنت طول الوقت احمس نفسي .. ونسيت الواقع ..

نسيت اني بشوف ناس مرضى قدامي .. ونسيت اني يمكن اشوف الدم..

طبعا انا ما اقدر على منظر الدم يخليني ادوخ ..

كنت طايرة من الحماس وما فكرت في الواقع ..

..

السبت 30 اكتوبر ..

كان اول يوم عمل في المستشفى ..تتوقعوون شنو صار ..؟

الصباح كان عندي اجتماع مع المسؤلة عنا احنا كقروب جديد.. سوت لنا محاضرة سريعة عن سياسة المستشفى والمكان والسيفتي ..الخ

لهنا والشعور الحماس حلوو وعال العال .. لحد ما قالت يلا معاي اسوي لكم جولة عشان اوريكم المستشفى ..

وتتعرفون على الامكان الي راح تحتاجونها او راح تتعاملون معاها..

لهنا والوضع حلو .. بس اول ما دخلنا قسم التنويم وشفت المكان الي راح اشتغل فيه..

انصدمت ..!

المكان غريب..مخيف .. يعور القلب ..المرضى في كل مكان حولي ..

يتوجعون .. يصيحون .. يكسرون الخاطر بمعنى الكلمة ..

اكتئبت وعورني قلبي وقلت شسويت في نفسي انا ..؟

كان عندي شعور اني ابي اخذ اغراضي واهرب من المكان .. ما حبيته ما ارتحت.. خفت ..

وقعدت افكر انا شلون بشوف هالمناظر كل يوم كل يوم !! كيف بقدر اتحمل ..

شسويت في ن فسي انا !!

كل هالامور كانت تدور في خاطري لكن ما خليت الي حولي يحسون .. ورسمت الابتسامة على وجهي ..

لحد ما جا وقت البريك ..رحت الكفتيريا .. حسيت بوحدة .. فقدت زميلاتي .. فقدت جمعنا وسوالفنا وقت البريك ..

وقعدت مع نفسي افكر .. واصبر حالي واقول هذا شعور طبيعي .. ما عليه بس اول يوم .. وارجع اقول لااا شسويت في نفسي انا..؟؟

وارجع اذكر روحي اني استخرت ربي ..وربي اكيد مختار لي الاحسن .. واكيد اكيد هالمكان احسن .. ومن ستخار ربه ما خاب ..

..

كلمني زوجي يتطمن .. وحكيت له شلون طبيعة الشغل وكيف اني شفت المرضى حولي .. واني خفت والخ ..

قال لي: عادي روحي حق المسؤولة عنكم وقولي لها اذا كان تقدر تنقلك وتحطك في مكان ما تختلطين فيه مع المرضى ..

وسويت الي قال لي .. ورحت لها .. وتكلمت معاها عن شعوري والحمد الله كانت متفهمة .. وودتني عند مسؤلها ..

وقعدنا نتكلم في الموضوع .. ما شاء الله عليه كان متفهم وعارف الشعور الي احس فيه .. والظاهرأنهم متعودين يتعاملون مع الناس الي تنصدم مثلي ..

وانا مو اول حالة امر عليهم .. وقالي عادي تبين تغييرين فيه مجال لكن المسمى بيختلف والراتب بيختلف ..

انا قعدت افكر اقول لنفسي هالسببين هم الي خلوني اقبل بهذة الوظيفة.. والحين بيطيرووون آه شسويت في نفسي انا ..؟؟

رجع يكلمني عن مميزات الوظيفة .. ويصبرني ويقول: انتي عطي نفسك فرصة ..لا تتعجلين .. وجربي بتلقين نفسك تعودتي وهالشعور يخف مع الوقت ..

وهذة الحياة الواقعية .. فيها الصحة وفيها المرض !! .. وكلنا مرينا في هالاحساس..

شغلك هذا راح يطورك .. يعلمك شلون تتعاملين مع مختلف الشخصيات ..راح يعطيك خبرة مناسبة ..

يعني راح يفيدك على الصعيد العملي والشخصي ..وإذا ما ارتحتي في القسم الي انتي فيه .. راح انقلك قسم ثاني بس لا تفكرين تغيرين الوظيفة ما انصحك ابداً

بصراحة ريحني كلامه.. خصوصا معرفة ان عندي حرية الاختيار هالشي مره يطمن ..

..

كلمت الوالدة ربي يخليها .. وفضفضت لها ..

قالت لااا قوي قلبك وبالعكس ربي يعطيك الثواب حتى لو انك بس ابتسمت في وجة مريض .. وخففتي عنه ..

كلامها شجعني وخلاني اقوي قلبي واكثر واكثر ..

..

اليوم الثاني..

داومت وانا هالاحساس للحين يراودني .. واردد بتعود .. بصير احسن وهالاحساس بيروح قريب ..

والحمد الله التقيت بوحده من زميلاتي وقعدت اسولف معاها .. تعرفون احساس الي مثل الغريب .. ويشوف احد من بلده !!

من جد ترد له الروح ..سولفت معها وفضفت لها وقالت لي لاااا طبيعي .. كلنا حسينا كذا بس ان شاء الله كل الامور تتسهل ..

انتي بس خلصي اول اسبوع على خير وبعدين بتحسين ان كل الامور عادية .. وبتنبسطين ..

وفعلا حطيت هالنقطة في بالي وشجعت نفسي اكملها ..

…

ثالث يوم ..

خلصت فترة التعريف بالمتشفى وجا الوت الي اتعرف فيه على رئيستي وعلى القسم الي راح اكون فيه ..استلمت الشغل ..

حدى الزميلات المكلفة بتدريبي علمتني على طبيعة شغلي وتعلمت بعض الاشياء ..

تحسنت نفسيتي .. بدأ الخوف الي في قلبي يخف تتدريجياً.. وبديت احب شغلي الجديد ..

صرت امشي في السيب ما اطالع في الغرف عشان لا تطيح عيني على مريض يتألم ..

وأغلب اليوم اشغل نفسي بالشغل عشان اتجنب المرضى قدر الامكان .. لحد ما اتعود شوي شوي .. والحمد الله ان شغلي مو مرتبط فيهم بشكل مباشر

اشوفهم من بيعد لبعيد .. واسمع من الدكاترة والممرضات عن احوالهم .. بس احاول اني ما اندمج معاهم مره عشان لا تتعب نفسيتي ..

…

الحمد الله ..رجعت امشي بثقة .. اتكلم بثقة.. وتواعدت مع زميلتي الي كنت اعرفها من اول ..ان نتلاقى كل يوم وقت البريك وناكل سوا ونسولف ..

…

وعدا الاسبوع ..واليوم الخميس ..

فخورة بنفسي .. الحمد الله قدرت اني انجو من اول اسبوع في المستشفى ..

يمكن يكون الي سويته ما هو بالشي الكبير الي يخليني فخورة ..

لكن مبسوطة من نفسي اني قدرت اعلم نفسي اتحمل .. قدرت احارب مخاوفي ..وما خليتها تتمكن مني ..

وبدأت احب شغلي الجديد وأتعلق فيه .. واتحمس له اكثر واكثر ..

دعواتكم لي بالتوفيق ..

جمح الرغبه في الكلام وابداء الرأي في موضوع يخص شخص ما يقف امامنا ..قد تكون لدى البعض صعبة للغاية ..!!

..

متى نقوم بطرح ارائنا في موضوع بخص الاخرين !

طبعا اكيد ..عندما يطلب منا ذلك ..

لكن للاسف جرت العادة في مجتمعاتنا .. بطرح ارائنا وفرضها احيانا حتى بدون طلب من اصحاب الشأن ..

من باب ما يسمى بـ ” الميانة”، نعم قد “أمون” على امي اختي صديقتي ..الخ ..

لكن هذا لا يعطني الحق بأن اتدخل واطرح أرائي بدون اي يطلب من صاحب الشأن!

خصوصا في حالة اتخاذ القرار من الطرف الاخر ..!

جميل ان نتشاور .. ونأخذ اراء من حولنا ..

فإني عندما أكون في مرحلة اتخاذ القرار ..أكون بحاجة

لأستشارة ذوي الخبرة .. مثل امي .. اختي ..الخ

لانه قد تغيب عن ناظري بعض الحقائق ..من إيجابيات أو سلبيات..

لكن ..

عندما أتخذ قراري بأقتناع .. او أخُذ قرار أجبرتني عليه الظروف..

“إي إني ليس بيدي حيلة” فإني أكون في أمس الحاجة لتشجيع ..

وفي هذة المرحلة لا أظنُ انني بحاجة الى رؤية سلبيات قراري ..

أو ما يسمى بـ ” تكسير المجاديف “! وهو فن يتقنه الكثيـــر من أعداء النجاح !

ماذا أستفيد أنا كشخص عندما اُكسر مجاديف من امامي ..

وانهال عليه بقائمه مطولة بسلبيات وتبعات ..قراره !!!

خصوصا عندما يكون قد اتخذ القرار .. او قد يكون بدأ في تنفيذه.. او ليس بيده حيلة لتغيره!!

ان بعض المجاملة لن تضرني بشئ .!

لكن الصراحة الغير مدروسة ..قد تسبب الاحباط لمن حولي !!

ام هي رغبة ذاتية لأثبت للجميع بأني “أبو العريف” صاحب الآراء السديدة ..

التي لا تشوبها شائبة!!!

والأَمر والادهى .. إن البعض لا يكتفي بطرح آرائه انما بفرضها والاصرار عليها ..

خصوصا عندما يبدأ صاحب الشأن بطرح وجهة نظره وأسبابه او بطرح ايجابيات قراره ..

***

نعم لكل منه الحق بدفاع عن معتقداته وما يؤمن ويصدق به ..

لكن بدون الإلحاح عليها وفرضها واجبار الاخرين على التصديق بها!!

لكل شخص متطلبات وظروف تختلف عن الآخر .. ما يناسبك قد لا يناسبني والعكس صحيح..

لذلك : ” فل تقل خيراً او لتصمت”

وحشتونـــــــــــــــــــي..

وحشتني المدونة والتدوين ..

واخيرا تعدلت الظروف ورجعت لكم على احر من الجمر..

امال وافكار وابداعات في بالي كثيرة…بتشوفونها قريبا ..

بس حبيت اقول لكم اني احبكم ووحشتوني ..

في مثل هاليوم .. جيت على الدنيا .. بعد انتظار طويل ..

6 سنوات .. من الانتظار ..

يا فرحتهم فيني ..

امي تقول ان اخواني كانوا يصطفون طابور .. كل شوي دور واحد عشان يحملني ..

اختي الكبيرة .. كانت هوايتها تلبسني وتكشخين وتصورني ..

اشكرها من كل قلبي صوري وانا بيبي كلها من ايدها …

كبرت كم سنة .. والي حولي معجبين .. بدلعي.. فصاحتي .. واسلوبي في الكلام ..

عيال خالتي .. يجون عند امي .. يطلبون ياخذوني عشان يودوني يم اصحابهم ..

عشان يورونهم الطفلة المعجزة

” ويوم تزوجت وشافوا زوجي .. علموه بالقصص .. الي كنت اسويها ..يؤؤؤه قمة الاحراج ..”

شيطونه شوي .. طويلة لسان شوي .. لكن على خفة دم …

….

وكبرت اكثر .. ونضجت .. ..” السنة الجاية اعطيكم التفاصيل ” >>>

والحين 25 سنة مرت ..

قدرت احقق فيها اهم احلامي ..

درست .. تخرجت .. توظفت .. تزوجت ..

كلها محطات من احلى محطات حياتي..

مرت علي لحضات حب وشوق ونجاج .. وفخر ..

ومرت علي لحضات  احباط .. لحضات حزن.. فقدت احباب .. ..

لكن ..

ما زالت احلم .. واتمنى ان احقق الكثير ..

امال واحلام كبيرة ودي احققها ..

اتمنى هالسنة تكون خير علي وعلى الجميع يا رب …

** اسفة اني ابتعدت فترة عن المدونة ..والتدوين ..

لظروف أمر فيها

دعواتكم

يمكنك من نشر مدونتك .. والبحث في المدونات الاخرى ..

** أوجه شكر لـفريق العمل .. أحمد عصام و حسين عادل

وأهنيهم على هالفكرة الحلوة …

روبوت المدونات ..في سطور

• يعتبر بلوجز روبوت أو روبوت المدونات بالعربية هو أول دليل عربي مفهرس للمدونات علي شبكة الويب حسب تصنيف المحتوي ، وفي نفس الوقت محرك بحث ذكي يمكنك من البحث عن اي مدونة من خلال التخصص او كلمه بحثية او اسمها ويعطي نتائج مفصله .
• المشروع جاء للتسهيل علي المستخدمين العرب علي شبكة الويب لإيجاد أداه فعالية وقوية للبحث عن المدونات العربية وتوفير معلومات شامله عن أي مدونه ويقدم معلومات شامله عن المدونات من خلال مجموعة من التصنيفات الرئيسية والفرعية التي توفر حل بسيط وسريع للوصول إلي المدونات بإختلاف تخصصاتها .
• الموقع بالطور التجريبي ، وندعوكم للمشاركة معنا بإنجاح الموقع ونشره بين المستخدمين العرب حتي تعم الأستفادة من الموقع لأن المدونات أصبحت هي الجيل الجديد للمحتوي علي شبكة الويب .

لزيارة الموقع ..

❤❤❤ كل عام وانتو وحبايبكم بألف خير ..

آنا فتاة مراهقة تحاول الانتحار بعد حادثة موت امها المريضة محترقة في المنزل ..ادخلت لمؤسسة للرعاية الصحية  النفسية وبعد 10 اشهر ..تعود لمنزلها للعيش مع اختها أليكس ووالدها ..لتتفاجئ  بأرتباط والدها بممرضة امها السابقة!

تبدأ الارواح تطارد آنا متمثلة بأمها وثلاثة اولاد صغار يحاولون تحذيرها واخبارها بأن حادثة الحريق مفتعلة .. بعد ذلك تعتقد آنا واختها ان زوجة ابيهم وراء الحادث .. ويحاولون الحصول على معلومات عن ماضيها وعن شخصيتها الحقيقة!…

* الفلم يعرض حالياً على Show cinema TV Max

~ أحب الافلام المرعبة الي تتمحور حول قصة غامضة .. وحبيت الاحداث المفاجئة الي قلبت القصة وغيرتها رأس على عقب!

وخلتني ارجع اشوف الفلم مرة ثانية عشان افهم الاحداث اكثر واكثر…

مين فيكم شاف الفلم!!! عطوني رايكمــ

صار لي فترة .. خاطري في شغلة .. وأدعي ربي ليل نهار أنها تتحقق ..

ومن كثر ما أنا افكر في هالشغلة .. أحس أاني ابي اي شي يطمني..

ودائم اطلب من ربي يعطيني لو لمحة .. متى يحقق لي هالحلم ..

…

انا عارفة ان ربي بيحقق لي امنياتي.. لاني ادعيه من كل قلبي .. ودائما اقول ..

“يؤجل الله امانينا ولا ينساها”..

…

البارحة حلمت  .. اني بسافر انا مع الوالدة الله يخليها لي ..

وقبل لا نسافر رحنا السوبر ماركت عشان نتقضى للسفر

طبعا اذكر ان من الاغراض الي شريتها فلفل رومي و طماطم واجبان !!

>>> الظاهر كان نفسي في سلطة قبل لا انام

المهم ما علينا ..

الي أذكره .. أن لما تقضينا وخلصنا طلعنا من السوبر ما ركت وقعدنا ندور الباص الي بنسافر فيه …

وشفت اثنين يتهاوشون في الشارع ..

بعدها مشينا شوي ولما شفنا الباص ..

نزل مطر غزيــــــــــــــر بقوة .. وظل ينزل علينا المطر ينزل ..

والناس ملتمة في الشارع والمطر ينزل ينزل ينزل…

وشفت بعض الاشخاص الي اعرفهم ..  واقفين مثلي في المطر ..

وبعدها صحيت من النوم…

احس ان هالحلم بشرة خير .. مثل ما يقولون ان المطر خير ..

يارب حقق لكل مؤمن ومؤمنة امانيهم يا رب..

….

* من وقتها وانا مشتاقة متى ينزل المطر ..!